EPFO પગાર મર્યાદામાં વધારો, હવે ₹25,000 સુધીના કર્મચારીઓને મળશે લાભ

કેન્દ્ર સરકારે EPFO હેઠળ ફરજિયાત કવરેજ માટેની પગાર મર્યાદામાં વધારો કરવાનો નિર્ણય લીધો છે. કેન્દ્રીય કેબિનેટે શ્રમ અને રોજગાર મંત્રાલયના પ્રસ્તાવને મંજૂરી આપતા માસિક પગાર મર્યાદા ₹15,000થી વધારીને ₹25,000 કરી છે. કેન્દ્રીય મંત્રી અશ્વિની વૈષ્ણવે જણાવ્યું કે આ નિર્ણયથી લગભગ 51 લાખ કર્મચારીઓને સીધો લાભ મળશે. આ માટે સરકાર દ્વારા ₹11,339 કરોડનો ખર્ચ કરવામાં આવશે. તેમણે જણાવ્યું કે લાંબા સમયથી પગાર મર્યાદા વધારવાની માંગ કરવામાં આવી રહી હતી અને હવે કર્મચારીઓ તથા નોકરીદાતાઓ બંને માટે સામાજિક સુરક્ષાનું કવરેજ વિસ્તૃત થશે.

₹15,000થી ₹25,000 પગાર ધરાવતા કર્મચારીઓને લાભ

હાલમાં જે નવા કર્મચારીઓનો માસિક પગાર ₹15,000થી વધુ હોય છે તેઓ આપમેળે EPFO હેઠળ ફરજિયાત કવરેજમાં આવતા નથી. જેના કારણે આવા ઘણા કર્મચારીઓ પ્રોવિડન્ટ ફંડ, પેન્શન અને સંબંધિત વીમા સુરક્ષાથી બહાર રહી શકે છે. હવે પગાર મર્યાદા વધારીને ₹25,000 કરવામાં આવતા ₹15,000થી ₹25,000 સુધીનો પગાર ધરાવતા કર્મચારીઓ પણ ફરજિયાત સામાજિક સુરક્ષાના દાયરામાં આવશે.

કર્મચારીઓને શું ફાયદો થશે?

EPFO સાથે જોડાયેલા કર્મચારીઓને ભવિષ્ય માટે બચત, પેન્શન અને વીમા જેવી સુરક્ષા સુવિધાઓ મળે છે. નવી પગાર મર્યાદા લાગુ થયા બાદ વધુ કર્મચારીઓ આ લાભ મેળવી શકશે. સરકારના જણાવ્યા મુજબ, છેલ્લા કેટલાક વર્ષોમાં પગાર સ્તરમાં વધારો થયો છે અને વધુ લોકો નોકરીના સંગઠિત ક્ષેત્ર સાથે જોડાઈ રહ્યા છે. તેથી EPFOની મર્યાદામાં વધારો કરવાનો નિર્ણય લેવામાં આવ્યો છે.

નવી મર્યાદા 17 સપ્ટેમ્બરથી લાગુ

સરકારના નિર્ણય મુજબ નવી EPFO પગાર મર્યાદા 17 સપ્ટેમ્બર 2026થી અમલમાં આવશે. આ નિર્ણય વધતા પગાર સ્તર, આવકમાં વધારો અને દેશમાં ઔપચારિક રોજગારના વિસ્તરણને ધ્યાનમાં રાખીને લેવામાં આવ્યો છે.

આ પણ વાંચો: Gold and Silver Price Today : સોના અને ચાંદીમાં આવ્યો ઊછાળો, જાણો તમારા શહેરમાં શું છે ભાવ?

અગાઉ 2014માં થયો હતો વધારો

EPFOની પગાર મર્યાદા 2004થી 2014 દરમિયાન યથાવત રહી હતી. સપ્ટેમ્બર 2014માં તેને વધારીને ₹15,000 કરવામાં આવી હતી. હવે વધતા પગાર સ્તર અને ઔપચારિક રોજગારના વિસ્તરણને ધ્યાનમાં રાખીને આ મર્યાદા ₹25,000 કરવામાં આવી છે.

Watch onYouTube