UPI MDR પર GSTમાં મળી શકે રાહત! નાના વેપારીઓ માટે 7 ઓક્ટોબરની બેઠક મહત્ત્વપૂર્ણ

₹2,000થી વધુના કેટલાક UPI વ્યવહારો પર લાગનારા Merchant Discount Rate એટલે કે MDR ઉપરના GSTમાંથી નાના વેપારીઓને રાહત મળી શકે છે. 7 ઓક્ટોબરે યોજાનારી GST Councilની બેઠકમાં આ મુદ્દે ચર્ચા થવાની શક્યતા છે. ખાસ કરીને GSTમાં નોંધાયેલા ન હોય અને Input Tax Creditનો લાભ ન મેળવી શકતા નાના વેપારીઓ માટે આ નિર્ણય મહત્ત્વપૂર્ણ રહેશે.

પ્રસ્તાવિત વ્યવસ્થા અનુસાર 15 ઓક્ટોબરથી ₹2,000થી વધુના કેટલાક Person-to-Merchant એટલે કે P2M UPI વ્યવહારો પર મહત્તમ 0.4% MDR લાગુ થઈ શકે છે. MDRની રકમ પર 18% GST લાગશે. ગ્રાહકે કરેલા સમગ્ર UPI પેમેન્ટ પર 18% GST નહીં લાગે. ઉદાહરણ તરીકે, કોઈ ગ્રાહક વેપારીને UPIથી ₹10,000 ચૂકવે અને તેના પર 0.4% MDR લાગે તો MDR ₹40 થશે. તેના પર 18% પ્રમાણે ₹7.20 GST લાગશે. આમ વેપારીનો કુલ ખર્ચ ₹47.20 થઈ શકે છે. MDRની રકમ સામાન્ય રીતે પેમેન્ટ સેટલમેન્ટ દરમિયાન વેપારીને મળતી રકમમાંથી કાપવામાં આવે છે.

કોને વધુ અસર થઈ શકે?

વસ્તુઓનું વેચાણ કરતા ₹40 લાખથી ઓછું વાર્ષિક ટર્નઓવર ધરાવતા અને સેવાઓ આપતા ₹20 લાખથી ઓછું ટર્નઓવર ધરાવતા અનેક નાના વ્યવસાયોને સામાન્ય રીતે GST નોંધણીમાંથી છૂટ મળી શકે છે. આવા વેપારીઓ Input Tax Creditનો દાવો કરી શકતા નથી. પરિણામે MDR પર ચૂકવેલો GST તેમના માટે સીધો ખર્ચ બની શકે છે. બીજી તરફ, GSTમાં નોંધાયેલા અને કરપાત્ર વસ્તુઓ અથવા સેવાઓ વેચતા વેપારીઓ MDR પર ચૂકવેલા GSTનો ITC મેળવી શકે છે. તેથી આ ટેક્સ તેમના માટે અંતિમ ખર્ચ ન પણ બને.

તમામ વ્યવહારો પર સરખો MDR નહીં

₹2,000થી વધુના તમામ UPI વ્યવહારો પર એકસરખો દર લાગુ થવાની શક્યતા નથી. અહેવાલ પ્રમાણે રેલવે, કૃષિ અને શિક્ષણ સંબંધિત કેટલાક વ્યવહારો માટે ₹5નો ફ્લેટ MDR પ્રસ્તાવિત છે. P2P એટલે કે એક વ્યક્તિથી બીજી વ્યક્તિને કરવામાં આવતા UPI ટ્રાન્સફર આ વ્યવસ્થાથી અલગ રહેશે.

ટેક્સ નિષ્ણાતોના મતે GST Councilએ MDR પર GSTની ગણતરી, ઇનવોઇસ પ્રક્રિયા અને ITC સંબંધિત નિયમો સ્પષ્ટ કરવા જરૂરી છે. MDRની જાહેર કરેલી મર્યાદામાં GST સામેલ છે કે તેના પર અલગથી GST લાગશે તે પણ સ્પષ્ટ થવું જોઈએ. હાલ આ માત્ર સંભવિત ચર્ચાનો મુદ્દો છે, અંતિમ નિર્ણય નથી. તેથી નાના વેપારીઓ અને ડિજિટલ પેમેન્ટ ઉદ્યોગની નજર હવે 7 ઓક્ટોબરની GST Councilની બેઠક પર રહેશે.

આ પણ વાંચો: સચિન તેંડુલકર સમર્થિત Spinny ₹3,000 કરોડનો IPO લાવશે

આ પણ જુઓ:

Watch onYouTube