ખેતરથી સીધા ગ્રાહક સુધી પહોંચશે પ્રાકૃતિક ઉત્પાદનો! વલસાડમાં ‘પ્રભા’ કેન્દ્રની શરૂઆત

વલસાડમાં પ્રાકૃતિક ખેતી કરતા ખેડૂતોને તેમના ઉત્પાદનો માટે વધુ સારી બજાર વ્યવસ્થા મળે અને નાગરિકોને પ્રાકૃતિક કૃષિ પેદાશો સરળતાથી ઉપલબ્ધ થાય તે દિશામાં નવી પહેલ શરૂ કરવામાં આવી છે. મુખ્યમંત્રી ભૂપેન્દ્ર પટેલે નાણાં, શહેરી વિકાસ અને શહેરી ગૃહ નિર્માણ મંત્રી કનુભાઈ દેસાઈ તથા સાંસદ અને લોકસભા દંડક ધવલભાઈ પટેલની ઉપસ્થિતિમાં ‘પ્રભા પ્રાકૃતિક કૃષિ ખેત ઉત્પાદન વેચાણ કેન્દ્ર’નું લોકાર્પણ કર્યું હતું.

એક જ સ્થળે પ્રાકૃતિક કૃષિ પેદાશો

મુખ્યમંત્રીએ વેચાણ કેન્દ્રનું નિરીક્ષણ કરીને અહીં ઉપલબ્ધ ઉત્પાદનો અંગે માહિતી મેળવી હતી. આ કેન્દ્રને મોડલ સેન્ટર તરીકે વિકસાવવામાં આવ્યું છે. અહીં પ્રાકૃતિક રીતે ઉગાડવામાં આવેલી તાજી શાકભાજી, ફળો, અનાજ અને મધ ઉપલબ્ધ રહેશે. આ ઉપરાંત પ્રાકૃતિક ખેતી માટે જરૂરી ‘ઘન જીવામૃત’, ‘ગૌમૂત્ર’, ‘બીજામૃત’ અને ‘જીવામૃત’ જેવી સામગ્રી પણ ખેડૂતો અને ગ્રાહકો માટે વેચાણ માટે મૂકવામાં આવી છે.

ખેડૂતોને બજાર અને યોગ્ય ભાવનો આધાર

પ્રાકૃતિક ખેતીથી ઉત્પાદિત પેદાશોને યોગ્ય વેચાણ વ્યવસ્થા અને બજાર મળી રહે તે માટે આ કેન્દ્ર મહત્વપૂર્ણ બની શકે છે. સાથે જ નાગરિકોને ગુણવત્તાયુક્ત પ્રાકૃતિક કૃષિ ઉત્પાદનો સરળતાથી મળી રહે તેવી વ્યવસ્થા ઊભી કરવામાં આવી છે. આ પહેલથી પ્રાકૃતિક ખેતી કરતા ખેડૂતોને પ્રોત્સાહન મળવાની સાથે નાગરિકોમાં પ્રાકૃતિક ખેતીના ઉત્પાદનોના ઉપયોગ અંગે જાગૃતિ વધારવાનો પણ હેતુ છે.

વલસાડમાં 10 કિઓસ્કની યોજનાનો ભાગ

‘પ્રભા’ વેચાણ કેન્દ્ર વલસાડ જિલ્લામાં સ્થાપિત થનારા 10 કિઓસ્કની યોજનાનો એક ભાગ છે. તેનો મુખ્ય ઉદ્દેશ પ્રાકૃતિક ખેતી કરતા ખેડૂતોના ઉત્પાદનો માટે મજબૂત સપ્લાય ચેઈન ઊભી કરવાનો છે. ઉત્પાદનથી લઈને સીધા ગ્રાહકો સુધી વેચાણની પ્રક્રિયા સરળ બને અને ખેડૂતોને તેમના ઉત્પાદનોના યોગ્ય ભાવ મળી રહે તે માટે આ વ્યવસ્થા વિકસાવવામાં આવી રહી છે. આ કાર્યક્રમમાં વલસાડના ધારાસભ્ય ભરતભાઈ પટેલ, જિલ્લા વિકાસ અધિકારી અતિરાગ ચપલોત અને જિલ્લા પોલીસ અધિક્ષક યુવરાજસિંહ જાડેજા સહિતના મહાનુભાવો ઉપસ્થિત રહ્યા હતા.

આ પણ વાંચો: IPO Update | 04 November 2026: આજે કયો IPO ખુલશે અને કયામાં અરજીની છેલ્લી તક મળશે

આ પણ જુઓ:

Watch onYouTube