વિશ્વના પ્રવાસન ઉદ્યોગની નજર ભારત પર: 2027માં WTTC સમિટનું આયોજન

ભારતના પ્રવાસન ક્ષેત્ર માટે હવે પ્રશ્ન માત્ર કેટલા લોકો ફરવા જાય છે તેનો નથી. પ્રવાસનની વધતી માંગને નવા રોકાણ, સારી કનેક્ટિવિટી અને વધુ આંતરરાષ્ટ્રીય ખર્ચમાં કેવી રીતે પરિવર્તિત કરવી તે પણ મહત્વનું બન્યું છે. આ જ ચર્ચા માટે 2027માં વિશ્વના પ્રવાસન ઉદ્યોગના અગ્રણી લોકો નવી દિલ્હીમાં સમિટનું આયોજન કરવામાં આવ્યું છે. વર્ષ 2027 માટે World Travel & Tourism Council—WTTCએ પોતાની Global Summit માટે ભારતની પસંદગી કરી છે.

WTTCના ચેરમેન મેનફ્રેડી લેફેબ્રે દ’ઓવિડિયોના જણાવ્યા અનુસાર, આ સમિટના યજમાનપદ માટે 21 દેશોમાંથી ભારતને પસંદ કરવામાં આવ્યું છે. સમિટમાં આંતરરાષ્ટ્રીય પ્રવાસન કંપનીઓના લીડર્સ, રોકાણકારો અને નીતિનિર્માતાઓ ભાગ લેશે. વૈશ્વિક પ્રવાસન ક્ષેત્રની આગામી દિશા સાથે ભારતના પ્રવાસન વ્યવસાયમાં ઉપલબ્ધ તકો અંગે પણ ચર્ચા થશે.

આ આયોજનનું મહત્વ માત્ર આંતરરાષ્ટ્રીય કાર્યક્રમની યજમાની પૂરતું નથી. ભારતને પોતાની પ્રવાસન ક્ષમતા એવા ઉદ્યોગ સમક્ષ રજૂ કરવાની તક મળશે, જેના નિર્ણયો હોટેલોમાં રોકાણથી લઈને ફ્લાઇટ કનેક્ટિવિટી અને પ્રવાસન સ્થળોના વિકાસ સુધી અસર કરે છે. વૈશ્વિક કંપનીઓ સાથેનો સીધો સંવાદ નવી ભાગીદારી અને રોકાણ અંગેની ચર્ચા માટે દ્વાર ખોલવાની સંભાવનાઓ વધી ગઈ છે.

WTTCના પ્રેસિડેન્ટ અને CEO ગ્લોરિયા ગેવારાએ ભારતની પ્રવાસન ક્ષમતા, આર્થિક વૃદ્ધિ અને વિસ્તરતી વૈશ્વિક કનેક્ટિવિટીને સમિટ માટેની પસંદગીનાં મહત્વપૂર્ણ પરિબળ ગણાવ્યાં છે. તેમના જણાવ્યા અનુસાર, ભારતનો વ્યાપ અને પ્રવાસન ક્ષેત્રને આગળ વધારવાની મહત્ત્વાકાંક્ષા તેને વૈશ્વિક પ્રવાસન લીડર્સ માટે યોગ્ય સ્થળ બનાવે છે.

કેમ ભારતની પસંદગી કરવામાં આવી?

ભારત પાસે મોટું સ્થાનિક પ્રવાસન બજાર છે. જોકે, વધુ વિદેશી પ્રવાસીઓને આકર્ષવા અને તેમના ખર્ચમાં વધારો કરવો ક્ષેત્રની આગામી વૃદ્ધિ માટે મહત્વપૂર્ણ પ્રાથમિકતા બની રહ્યો છે. WTTCના સંશોધનમાં પણ સ્થાનિક માંગના મજબૂત આધાર સાથે આંતરરાષ્ટ્રીય પ્રવાસન ખર્ચમાં ભારતનો હિસ્સો વધારવાની તકો દર્શાવવામાં આવી છે.

આ બંને પ્રકારની માંગ પ્રવાસન ઉદ્યોગ માટે અલગ શક્યતાઓ ઊભી કરે છે. સ્થાનિક પ્રવાસન વ્યાપક ગ્રાહક આધાર આપે છે, જ્યારે આંતરરાષ્ટ્રીય માંગને આકર્ષવા માટે વૈશ્વિક બજારમાં ભારતનાં સ્થળો અને અનુભવોને વધુ અસરકારક રીતે રજૂ કરવાની જરૂર રહે છે. સમિટમાં ભારત વૈશ્વિક પ્રવાસન માંગનો વધુ હિસ્સો કેવી રીતે મેળવી શકે તે અંગે ચર્ચા થવાની અપેક્ષા છે.

ગ્લોરિયા ગેવારાએ જણાવ્યું કે સમિટ WTTCના વૈશ્વિક સભ્યો સમક્ષ ભારતને રજૂ કરવાની અને જાહેર–ખાનગી ભાગીદારી મજબૂત કરવાની તક બનશે. સરકાર અને ખાનગી કંપનીઓ વચ્ચેનો સહયોગ પ્રવાસન ક્ષેત્રમાં ખાસ મહત્વ ધરાવે છે, કારણ કે પ્રવાસનો અનુભવ એક જ વ્યવસાય પર આધારિત નથી. તેમાં પરિવહન, હોટેલ, ઇન્ફ્રાસ્ટ્રક્ચર, ટેક્નોલોજી અને સ્થળની સુવિધાઓ એકબીજા સાથે જોડાયેલી હોય છે.

સમિટના સહભાગીઓ સામાન્ય રીતે રોકાણ, ઇન્ફ્રાસ્ટ્રક્ચર, કનેક્ટિવિટી, હૉસ્પિટાલિટી, ઉડ્ડયન, ટેક્નોલોજી અને પ્રવાસન સ્થળોના વિકાસ જેવા ક્ષેત્રોનું પ્રતિનિધિત્વ કરે છે. દિલ્હીમાં યોજાનારી 2027ની સમિટ ભારતને વૈશ્વિક પ્રવાસન ઉદ્યોગ સમક્ષ પોતાની આગામી વૃદ્ધિની દિશા રજૂ કરવાની તક આપશે.

આ પણ વાંચો: Michelin Key 2026: ભારતની 47 હોટેલને માન્યતા, સાસણ ગીરની Woods at Sasanને One Key

આ પણ જુઓ:

Watch onYouTube